Gipahayag sa kanhi Integrated Bar of the Philippines (IBP) President ug human rights defender nga si Atty. Eddie Cuaresma nga ang pagpagawas og warrant of arrest sa Quezon City Court batok kang Vice President Sara Duterte alang sa kasong grave threats nagpakita nga adunay bug-at nga basihan ang mga akusasyon nga posibleng makadugang sa katimbang sa padayon nga impeachment trial.
Sa pakighinabi sa Bombo Radyo, gipasabot ni Cuaresma nga bisan kon maglahi ang hurisdiksyon sa duha ka proseso—diin ang kasong kriminal nagdala og silot nga pagkabilanggo samtang ang impeachment nagtumong sa pagtangtang sa katungdanan—ang pagkakita sa korte og prima facie evidence nagpamatuod nga adunay kasiguruhan ug lig-ong basehanan ang reklamo batok sa Bise Presidente.
Gidugang sa legal expert nga magdepende na karon sa mga Senator-Judges kon unsaon nila pagtimbang ang maong kalamboan subay sa ilang pagbarog sa balaod ug kaangayan. Bahin sa giatubang nga impeachment court (Day 21) diin gigamit ang prinsipyo sa command responsibility sa gigasto nga pondo sa kagamhanan, gihimug-atan usab ni Cuaresma ang kaepektibo sa pagpabilin sa maayong proseso pinaagi sa paghatag og igong higayon sa Bise Presidente nga makapresentar sa iyang depensa.