Gipahayag sa Liga ng mga Barangay President sa Malaybalay City nga si City Councilor Julius Maghanoy nga dako nga bentaha alang sa mga kabarangayan kon ugaling hingpit nga mapasar ang balaod nga naglugway sa termino sa mga opisyal sa barangay ug Sangguniang Kabataan gikan sa upat ngadto sa lima ka tuig.
Sa pakighinabi sa Bombo Radyo, gipasabot ni Maghanoy nga mas haum ang lima ka tuig nga paglingkod aron hingpit nga maipatuman ang lima ka tuig nga Barangay Development Plan. Dugang pa sa opisyal, mas hatagan niini og igong panahon ang mga kapitan nga makakompleto sa ilang mga importanteng proyekto sa komunidad nga kasagaran dili mahuman sulod sa mubo nga termino.
Gihimug-atan usab ni Maghanoy nga makatabang ang maong lakang sa nasyonal nga kagamhanan aron makatipid sa pondo pinaagi sa pag-akomodar sa mas taas nga election cycle. Samtang gipadayag sa opisyal nga iyang girespeto ang panawagan sa pipila ka botante nga ipadayon ang piliay, gipahimangnoan usab niini ang mga kasamtangang opisyal nga magpabilin nga transparent ug gamiton ang dugang nga panahon sa paghatag og tinuod nga serbisyo sa katawhan.