Gi-aprubahan sa House of Representatives ang Committee Report 261 nga may kalabotan sa impeachment complaints batok kang Vice President Sara Duterte, human kini makakuha og 257 ka boto pabor, 25 supak, ug 9 ka abstention sa gihimong nominal voting kagahapong adlawa.
Tungod niini, opisyal nga naproseso pag-usab ang impeachment batok sa Bise Presidente, ug mapadala na ang Articles of Impeachment ngadto sa Senado alang sa pormal nga paglitis.
Kini nahitabo human milapas ang gikinahanglan nga one-third vote sa Kamarabaha sumala sa 1987 Constitution aron mapadayon ang impeachment proceedings.
Gipasiugda sa House of Representatives nga ang impeachment proceedings batok kang Bise Presidente Sara Duterte usa ka legal ug konstitusyonal nga proseso, ug dili lang basta politikal nga isyu.
Sumala kang House Committee on Justice Chairperson Rep. Gerville Luistro, nga ang impeachment usa ka seryosong obligasyon sa Kamara nga nagpakita sa katakos sa mga institusyon sa gobyerno sa pagbarog alang sa interes sa nasud.
Matud ni Luistro, nga adunay mga isyu nga dili na mahimong pasagdan ug kinahanglan atubangon sa tibuok nasod, ug kini ang naghatag basehan sa Articles of Impeachment.
Sumala usab ni Representative Zia Alonto Adiong nga mas kusgan ang suporta karong tuiga kumpara sa miaging Kongreso, base sa mas taas nga boto nga nakuha sa impeachment complaint.
Naaprubahan na sa Kamara ang pagpadala sa Articles of Impeachment ngadto sa Senado, nga magsilbing impeachment court, ug gilauman usab ang pagpili sa 11-member prosecution team.