Patay ang usa ka Commanding Officer sa Communist Terrorist Groups human makasangka ang mga tropa sa 8th Infantry Battalion sa duha ka serye sa engkwentro didto sa Sitio Takokon, Agusan del Sur kagahapon sa buntag.
Giila ang namatay nga si alyas “Todo,” Commanding Officer sa Regional Operations Command ug residente sa Lagonglong, Misamis Oriental.
Matud ni Lt. Col. Jeorge Jalorina, commanding officer sa 8th IB, unang miulbo ang panagsangka kaniadtong alas-8:30 sa buntag ug gisundan pa sa ikaduhang engkwentro bandang alas-11:30 samtang gigukod sa mga sundalo ang miatras nga grupo.
Dugay na nga gipanid-an sa militar ang grupo ni Todo sa maong dapit, ug pinaagi sa tabang sa intelligence information, natultolan ang eksaktong nahimutangan niini nga miresulta sa usa ka “meeting engagement.” Narekober sa dapit nga nahitaboan ang usa ka M16A1 rifle nga gipanag-iyahan kuno sa napatay nga rebelde.
Gibutyag ni Jalorina nga duna pay mga 14 ka sakop sa grupo ang padayong ginagukod sa hiniusang pwersa sa 403rd ug 402nd Brigades. Wala paman hinuoy na-report nga nasamdan o namatay sa bahin sa gobyerno.
Ang pagka-ila ni Todo nakumpirma pinaagi sa tabang sa mga kanhing rebelde. Nagtuo ang militar nga ang kamatayon ni Todo usa ka dakong kapildihan sa liderato sa teroristang grupo ug makatabang aron hingpit nga madeklarar nga insurgency-free ang Bukidnon kon ma-neutralize na ang mga nahabilin nga lider sa maong teroristang grupo.