Nag-insistir ang Estados Unidos nga nagpabiling bukas ug gawasnon ang estratehikong agianan sa Strait of Hormuz, kabaliskaran sa gipagawas nga opisyal nga anunsiyo sa nasod sa Iran nga kini hingpit na nilang gisirad-an taliwala sa nagka-grabe nga binayloay sa mga pag-atake sa duha ka kampo.
Kahinumdoman nga misamot ka init ang panagbangi human gipahayag sa Amerika nga malampuson nilang gubatan ug naigo ang kapin sa 140 ka mga military targets sa sulod sa Iran. Ang maong dako nga operasyon gihimo sa militar sa US isip bawos sa serye sa mga pagpamaril ug pag-atake sa mga puwersa sa Iran ngadto sa mga komersyal nga barko nga nagaagi sa maong dapit gamit ang giingong dili awtorisado nga ruta.
Bisan pa man sa bahad sa Iran, daling mibarog ang US Central Command (CENTCOM) ug si President Donald Trump nga nagpabiling bukas ang dagan sa trapiko sa dagat. Gitataw sa Amerika nga usa ka internasyonal nga agianan sa tubig ang maong strait, busa magpabiling andam ug nakaposisyon ang ilang puwersa sa pagpanalipod sa kagawasan sa nabigasyon aron masiguro ang luwas ug hapsay nga biyahe sa mga barko sa lana ug gas sa tibuok kalibutan.