Gipahunong sa usa ka US Appeals Court ang pagpatukod sa kontrobersyal nga White House ballroom project ni US President Donald Trump human gihukman sa korte nga kinahanglan una kini og pormal nga pag-uyon gikan sa US Congress.
Sa 2-1 nga desisyon sa US Court of Appeals for the DC Circuit, gipatin-aw sa mga huwes nga ang matag presidente usa lamang ka “temporaryong molupyo” sa White House ug walay direktang gahum sa pag-usab sa maong makasaysayanong pasilidad nga walay pagtugot sa balaod ug sa Kongreso.
Gisaway pag-ayo ni Trump ang maong desisyon ug gihulagway kini nga politically motivated ug usa ka hulga sa nasyonal nga seguridad. Nagpasalig ang lider sa US nga ilang iapelar ang maong usapin ngadto sa US Supreme Court aron mapadayon ang maong dako nga proyekto nga gibanabanang nagkantidad og $400 million hangtod $600 million.