MIDDLE EAST — Gikabalak-an karon nga mosangpot sa mas dako ug halapad nga giyera ang pagkamatay sa mga sundalo sa Estados Unidos human sa sunod-sunod nga pagpangatake sa Iran didto sa Jordan ug Iraq.
Kini nga insidente nahitabo sa ika-walo nga adlaw sa nagkagrabe nga binayloay og airstrike ug pagpangatake tali sa duha ka nasod. Gikumpirma sa US military nga usa ka sundalo ang namatay sa pag-atake sa Iran sa amihanang bahin sa Iraq. Nahitabo kini usa ka adlaw human gi-atake ang usa ka US military base sa Jordan diin duha ka Amerikanong sundalo ang namatay ug usa ang unang gideklara nga missing.
Sumala sa U.S. Central Command (CENTCOM), duna pu’y laing indibidwal nga nakalas ug usa ang naangol samtang nagpahigayon og controlled detonation sa usa ka bomba gikan sa natagak nga Iranian attack drone. Sa pagkakaron, nakit-an na sa mga otoridad ang usa ka lawas sa dapit diin nahitabo ang pag-atake sa Jordan ug ginasusi pa ang pagkakilanlan niini.
Sa kinatibuk-an sa hapit lima ka bulan nga panagbangi, miabot na ngadto sa 17 ang patay sa panig sa Amerika, samtang anaa sa 50 ka indibidwal ang namatay ug kapin sa 500 ang nangaangol didto sa Iran.