Gidakop ang usa ka talagsaong UFO-inspired nga sakyanan sa Oklahoma, USA, human kini makalapas sa balaod sa trapiko.
Atol sa patrol operation, namatikdan sa usa ka highway patrol officer ang maong sakyanan nga nagbiyahe paingon sa Roswell, New Mexico, aron motambong sa bantugang Roswell UFO Festival.
Bisan pa sa talagsaon nga disenyo niini nga sama sa usa ka UFO o Unidentified Flying Object, gipahunong ang sakyanan tungod kay dili klaro ug dili makita og tarong ang plate number, nga usa ka paglapas sa mga lagda sa trapiko.
Apan imbis nga tiketan, gipasidan-an lamang ang mga sakay ug gihangyo nga sigurohong klaro ug makita ang plate number sa ilang sakyanan sa sunod nilang pagbiyahe.
Nasayran usab nga dili kini ang unang higayon nga nasita ang maong UFO-inspired vehicle, tungod kay una na usab kini napara sa Missouri tungod sa isyu sa rehistrasyon sa sakyanan.