Nagpagawas og seryosong pasidaan si US President Donald Trump nga hingpit nga undangon sa Estados Unidos ang ilang suporta sa nasod sa Iraq kung mulingkod pag-usab isip Prime Minister si Nouri al-Maliki.
Pinaagi sa iyang post sa Truth Social, gitawag ni Trump nga usa ka “very bad choice” o dautang desisyon ang posibleng pagpabalik ni al-Maliki sa pwesto. Matod pa sa presidente, sa panahon nga nagdumala si al-Maliki kaniadto, ang Iraq naunlod sa tumang kawad-on ug kagubot.
Gidugang pa niya nga kung wala ang tabang sa Amerika, “zero” o walay tsansa nga molambo ug makabaton og kagawasan ang maong nasod.
Nigawas kini nga pahayag ni Trump human nominado si al-Maliki sa Coordination Framework, ang kinadak-ang pundok sa mga Shia sa parlamento sa Iraq, aron mahimong sunod nga Prime Minister.
Kahinumduman nga si al-Maliki nagsilbi na kaniadto isip lider sa Iraq gikan sa 2006 hangtod 2014, apan nahimong kontrobersyal ang iyang pagdumala tungod sa nagkagrabe nga panagbingkil sa mga relihiyosong grupo ug ang pagsaka sa impluwensya sa Iran sa maong rehiyon.
Sa pagkakaron, wala pa makapili og bag-ong presidente ang parlamento sa Iraq human gi-postpone ang ilang sesyon, butang nga mas nagpasamot sa tensyon sa politika sa maong nasod.