Nadakpan sa hiniusang pwersa sa kapulisan ang giila nga Top 3 Most Wanted Person sa rehiyonal nga lebel human sa gihimong operasyon sa Purok 6, Barangay Sumpong, Malaybalay City, Bukidnon, kagahapong adlawa, Mayo 4, 2026.
Ang dinakpan giila nga si Felimon Boiser Guiroy, 20-anyos ug usa ka laborer, kansa nag-atubang og seryosong kaso sa Qualified Rape batok sa usa ka minor de edad ug paglapas sa RA 7610 o Child Abuse.
Ubos sa pagpanguna ni PLTCOL Joepet Paglinawan sa Malaybalay City Police Station, gisilbi ang warrant of arrest batok sa suspek nga gipagawas niadtong Marso 29, 2026, diin walay pyansa nga girekomenda alang sa temporaryong kagawasan niini.
Sa pagkakaron, ang suspek anaa na sa kustodiya sa Malaybalay CPS alang sa dokumentasyon ug disposasyon sa pagpasaka sa tukmang mga kaso.