Thailand, gipanub-an ang visa-free stay sa mga turista sa kapin 90 ka nasud

Gipanub-an sa Thailand ngadto sa 30 ka adlaw ang visa-free stay sa mga turista gikan sa kapin 90 ka nasud ug teritoryo, sugod Septiyembre 15, 2026.

Apan ang Peru, Brazil ug South Korea magpabilin hangtod 90 ka adlaw nga walay visa.

Matud sa Department of Consular Affairs sa Thailand, kabahin kini sa mga pagbag-o sa visa exemption ug Visa on Arrival schemes sa nasud. Lakip sa maapektuhan ang mga turista gikan sa China, United States ug 27 ka nasud sa European Union.

Tumong sa maong bag-ong polisiya ang pagpugong sa pag-abuso sa visa system ug mga krimen nga naglambigit sa mga langyaw.