Subling mikunhod ang ihap sa mga barkong moagi sa Strait of Hormuz human misamot ang tensyon sa tali sa Estados Unidos ug Iran.
Base sa taho sa usa ka international organization sa mga independent tanker owners, gikan sa kasagarang dul-an sa 130 ka barko kada adlaw sa wala pa misiklab ang kagubot sa rehiyon, nahulog na lamang sa usa ka digit ang ihap sa mga barkong naggamit sa maong ruta.
Nahitabo kini human sa bag-ong pagbinayluay sa mga airstrike sa Estados Unidos ug Iran niadtong Miyerkules ug Huwebes.
Sumala sa militar sa U.S., gitarget sa ilang airstrike ang kapin sa 90 ka military targets sa Iran, lakip na ang pipila ka pasilidad nga duol sa Strait of Hormuz. Matud niini, tumong sa operasyon nga pahuyangon ang kapasidad sa Iran sa pag-atake sa mga komersiyal nga barko ug mga sibilyan nga moagi sa maong dapit.
Gikumpirma usab sa Iran nga labing menos 14 ka mga tawo ang namatay sa pinakabag-ong pag-atake sa Amerika.
Samtang, gitaho sa state media sa Iran nga adunay mga lugar nga naigo duol sa Bushehr Nuclear Power Plant, bisan wala pa magpagawas og opisyal nga pahayag ang Estados Unidos mahitungod niini.
Isip panimalos, miingon ang Islamic Revolutionary Guard Corps o IRGC nga nagpahigayon sila og mga pag-atake batok sa mga base militar sa Amerika sa Kuwait ug Bahrain, nga ilang gitawag nga sinugdanan pa lamang sa ilang “punitive response.”
Gipasidan-an usab sa IRGC nga adunay dugang pang missile attacks nga ipahigayon sa Kuwait, Jordan ug Iraq, diin adunay mga base militar sa Estados Unidos.
Sa laing bahin, sumala sa Iranian Ministry of Health, gawas sa 14 ka namatay, miabot na sa 78 ang nasamdan sa mga pagpamomba sa Amerika niadtong Hulyo 8 ug 9, ug 47 kanila ang padayon pang gipaubos sa pagtambal sa ospital.
Taliwala sa nagkagrabeng krisis, miingon si U.S. President Donald Trump nga gusto kuno sa Iran nga makigbalik sa negosasyon sa Amerika, apan nagduhaduha siya sa tinuod nga tuyo niini.
Gisalikway kini ni Iranian Foreign Minister Abbas Araghchi, nga miingon nga tubagon sa Iran ang mga lihok sa Amerika dili pinaagi sa halang nga mga pulong, kondili pinaagi sa mas grabe ug konkretong pagtubag.
Sumala sa international organization sa mga independent tanker owners, gikan sa dul-an sa 130 ka barko kada adlaw, nahulog na lamang sa usa ka digit ang ihap sa mga barkong naggamit sa maong ruta.
Nahitabo kini human sa bag-ong pinulihanay sa mga airstrike sa U.S. ug Iran, diin gitarget sa Amerika ang kapin sa 90 ka military sites sa Iran.
Gikumpirma sa Iran nga labing menos 14 ang namatay ug 78 ang nasamdan sa mga pag-atake, samtang nagpasidaan ang Tehran og dugang nga mga pag-atake batok sa mga base militar sa Amerika sa rehiyon.