Depensahan sa International Boxing Federation (IBF) minimumweight champion nga si Pedro Taduran ang iyang titulo batok sa top contender nga si Christian Balunan gikan sa Sugbo.
Ang away ipahigayun karong Oktubre 26 sa San Andres Sports Complex, Manila, ug kini ang opisyal nga mag-abli sa semanang kalihokan alang sa Thrilla in Manila 2 nga matapos sa Oktubre 29 sa Araneta Coliseum.
Matod ni Sean Gibbons, presidente sa MP Promotions ni Manny Pacquiao, nga usa ka world championship ang mopukaw sa nasud isip pagsugod sa Thrilla in Manila 2 festivities.
Si Pedro Taduran magdepensa sa iyang titulo batok sa usa ka undefeated nga challenger gikan Cebu.
Si Taduran nga adunay (18-4-1, 13 KOs) bag-ohay lang gipilde si Ginjiro Shigeoka sa Japan aron magpabilin ang titulo.
Karon, iyang depensahan kini batok kang Balunan nga adunay (12-0, 7 KOs).
Adunay napulo ka competitive fights nga mag-una sa Thrilla in Manila 2 countdown.
Lakip niini ang pakigbisog sa Hong Kong’s undefeated nga si Rex Tso nga adunay (23-0, 14 KOs) kontra kang Sagar Chouhan sa India alang sa IBF Pan Pacific bantamweight title.
Sa flyweight division, si Miel Fajardo mokigbisog kang Esneth Domingo alang sa vacant IBF Pan Pacific flyweight belt, samtang si Lienard Sarcon makig-atubang sa kauban Pilipino nga si Junibert Bantay.
Sa main event sa Thrilla in Manila 2 sa Araneta Coliseum, ang World Boxing Council minimumweight champion nga si Melvin Jerusalem mokigbisog batok sa South African challenger nga si Siyakholwa Kuse.
Daghan pang laing mga Pinoy fighters ang makita sa undercard lakip na sila si Eumir Felix Marcial, Marlon Tapales, ug Carl Jammes Martin.
Mokumbate usab si Nico Ali Walsh, apo sa boxing legend nga si Muhammad Ali.