Gimandoan sa Supreme Court ang Kongreso nga ipasa ang balaod batok sa political dynasties, diin giingon sa High Court nga mandatory ang maong katungdanan ubos sa 1987 Constitution.
Sumala kang Supreme Court spokesperson Camille Ting, ang paggamit sa pulong nga “shall” sa Article II, Section 26 sa Konstitusyon nagpasabot nga dili lamang kini pangandoy kondili usa ka constitutional command nga kinahanglan tumanon sa Estado.
Gipasabot ni Ting nga ang pulong nga “as may be defined by law” naghatag sa Kongreso sa gahum sa pagsaysay kung unsa ang political dynasty ug unsang matang sa relasyon ug posisyon ang sakop sa pagdili.
Matud sa Supreme Court, 39 ka tuig na sukad sa pag-ratify sa 1987 Constitution apan wala pa gihapon napasar ang komprehensibong balaod batok sa political dynasties.
Tungod niini, gimandoan sa korte ang Kongreso nga molihok uban ang pinakadakong pagdali aron matuman ang maong constitutional duty.