Gibutyag ni Commission on Elections (Comelec) Chairman George Erwin Garcia nga andam na ang Law Department sa pag-isyu og subpoena batok sa mga campaign donors ni Senador Rodante Marcoleta tungod sa giingong kapakyasan sa pagsumite sa Certificate of Donation sa miaging eleksyon.
Sumala ni Garcia, mahimo na bisan unsang orasa ang pag-isyu sa subpoena batok sa pipila ka indibidwal aron sila mapahigayon og pagsumite sa ilang counter-affidavit isip tubag sa reklamo nga gipasaka sa Comelec Political Finance and Affairs Department.
Gipasabot usab niini nga ang maong lakang kabahin sa preliminary investigation sa Law Department human sa motu proprio fact-finding imbestigasyon.
Samtang, gipatin-aw ni Garcia nga ang kaso nga gi-refer na sa Ombudsman dili na ilalom sa hurisdiksiyon sa Comelec, gumikan ang Ombudsman usa ka independent constitutional body.
Bisan pa niini, nagpadayon ang kooperasyon tali sa Comelec ug Ombudsman pinaagi sa data sharing ug pagbinayloay og mga dokumento aron mapadali ang imbestigasyon. Â
Gisiguro usab sa Comelec nga bisan na-dismiss na ang kaso sa ilang En Banc decision batok sa senador, magpadayon gihapon ang ubang imbestigasyon sa kampanya ug campaign finance violations sa ubang indibidwal.