Mubawas ang South Korea sa mga kawani sa embahada niini sa Ukraine tungod sa nagpadayong panagbangi kalabot sa pagbalhin sa duha ka sundalong North Korean nga nadakpan isip prisoners of war o POW ngadto sa South Korea.
Gikuwestiyon sa Seoul ang pagbutyag ni Ukrainian President Volodymyr Zelenskyy sa maong pagbalhin atol sa iyang pakigpulong sa United Nations niadtong Setyembre 23, tungod kay matud sa South Korea, adunay kasabotan nga dili kini ipahibalo sa publiko.
Apan, gilimod sa Ukraine nga adunay ingon niini nga kasabotan. Dugang sa panagbangi sa diplomatikanhong relasyon, gikonsiderar usab sa South Korea ang padayong hulga sa mga pag-atake sa Russia nga nagbutang sa kaluwasan sa mga kawani sa peligro.
Bisan pa sa pagkunhod sa mga kawani, magpabilin ang mga personnel nga nagdumala sa konsular nga serbisyo ug pagtabang sa mga South Korean citizen sa nasud.