Nakuha sa social media star ug artist nga si Ali Spagnola ang Guinness World Record alang sa pinakadakong tape measure sa tibuok kalibutan human kini makamugna og usa ka higanteng replika nga napulo ka pilo ang gidak-on tandi sa orihinal.
Kauban ang iyang team nga sila si Davis DeWitt ug Tyler Reece, gimugna sa maong grupo ang “Artsperson” tape measure sa North Hollywood, California, nga adunay sukod nga 0.87 metros ang gitas-on, 0.80 metros ang kahabugon, ug 0.56 metros ang kalapdon.
Kining maong kagamitan nga motimbang og 32 kilos ug gama sa 42 ka piraso nga na-3D print hingpit nga magamit ug makasugakod sa pagsukod og distansiya hangtod sa 76.2 metros gamit ang usa ka custom-built application.
Si Spagnola, kinsa naghupot na usab og rekord alang sa pinakadakong cotton candy sculpture, migahin og 40 ka oras aron maperpekto ang matag detalye sa maong imbensiyon.
Bisan ang Guinness adjudicator nga si Susana Reyes nahibulong pag-ayo tungod ang matag guhit ug numero niini eksakto gayod sa usa ka ordinaryo nga tape measure.
Matud pa ni Reyes, dako kini og kapuslanan alang sa mga adjudicator sa pagsukod sa uban pang dagkong world records sa umaabot nga katuigan.