Gipahibalo ni Ombudsman Jesus Crispin Remulla sa gipahigayon nga tigom sa mga tigbalita karong adlawa diha sa Office of the Ombudsman nga napirmahan na niya ang case information nga ipasaka ngadto sa Sandiganbayan batok kang Senator Jinggoy Estrada.
Matod pa ni Remulla, posibleng ipasaka kini karong Huwebes diin ang maong kaso konektado gihapon sa isyu sa flood control scandal nga nabisto sa mga nangaging imbestigasyon. Gihisgotan usab sa opisyal nga gawas sa plunder, lakip sad nga ipasaka ang kasong malversation batok sa senador. Sunod niini, gipahayag sad ni Ombudsman Remulla nga sulod sa duha ka semana, posible na sad nga mahuman ang iyang gihimong imbestigasyon batok kang Senator Joel Villanueva nga mamahimo sang mag-atubang ug kasong plunder.
Gihimakak naman ni Ombudsman Remulla ang pamahayag ni Senator Rodante Marcoleta nga iyang giinitan ang mga senador sa mayoriya may kalabotan sa isyu sa flood control project. Lakip man gud sa mga pasakahan og kaso mao sila si Senator Marcoleta, Senator Chiz Escudero, Senator Jinggoy Estrada, ug Senator Joel Villanueva nga pulos mga sakop sa mayoriya. Matod ni Remulla, anaa gayod sa flood control ug sa senado ang interes sa katawhan karon, hinungdan nga mao kini ang ilang giuna pagtubag gawas sa uban pang mga kaso nga giimbestigahan sa ilang mga panel sa tibuok Pilipinas.
Ug giandam na sad sa Office of the Ombudsman ang duha ka kaso batok kang kanhi House Speaker Martin Romualdez. Kini mao ang money laundering case ug ang gihulagway ni Remulla isip “greatest case of them all” o ang conspiracy to defraud the national treasury nga giingong unang higayon pa sa kasaysayan sa nasod. Gitataw hinuon niya nga dili niya gusto nga magpapriso og tawo, hinungdan nga iyang gihangyo ang mga nalambigit nga mangita og pamaagi pinaagi sa restitution o ang pag-uli sa kwarta diin nagpabilin kining bukas alang kanila.