Girekomenda sa Field Investigation Bureau sa Ombudsman ang pagpasaka og kasong plunder ug indirect bribery batok kang Senador Rodante Marcoleta human giingong nakadawat kini og kapin ₱75 milyones nga campaign donations niadtong miaging tuig.
Base sa complaint-affidavit nga gipirmahan niadtong Mayo 18, gustong pasakaan sa kaso si Marcoleta kauban si kanhi Quezon City 2nd District Representative Mike Defensor ug duha pa ka indibidwal nga giingong naghatag og donasyon sa senador.
Kabahin kini sa mas lapad nga imbestigasyon sa Ombudsman kalabot sa paggamit sa campaign funds ug posible nga paglapas sa anti-corruption laws.
Sa pagkakaron, wala pa’y opisyal nga pahayag gikan sa kampo ni Marcoleta ug sa ubang mga indibidwal nga nalambigit sa reklamo.
Ang kasong plunder usa sa labing bug-at nga kasong kriminal ilalom sa balaod ug adunay silot nga tibuok kinabuhi nga pagkabilanggo kon mapamatud-an nga sad-an.
Wala usab kini’y piyansa alang sa temporaryong kagawasan.
Samtang, ang bribery nagtumong sa ilegal nga pagdawat og salapi o pabor isip kabaylo sa impluwensya o paggamit sa gahum.