Gi-uyonan sa magsuong Senador nga sila Sen. Erwin Tulfo ug Sen. Raffy Tulfo nga mas maayong personal nga mo-atubang si Vice President Sara Duterte sa iyang impeachment trial aron matubag ang mga alegasyon batok kaniya sa dili pa sila mohatag sa ilang pinal nga desisyon.
Matud ni Senator Erwin Tulfo, ang Impeachment Court ang hustong plataporma aron ipasabot sa Bise Presidente ang iyang bahin ug mapanalipdan ang iyang kaugalingon batok sa mga akusasyon sa social media, ilabina para sa milyon-milyon niyang mga tagasuporta.
Bisan pa man nga adunay katungod ang korte nga mang-imbitar, gitin-aw ni Tulfo nga dili pwedeng pugson si VP Sara nga magpakita o mutambong tungod sa gitawag nga courtesy sa iyang posisyon isip ikaduhang pinakataas nga opisyal sa nasud.
Sa laing bahin, si Senator Raffy Tulfo naglantaw usab nga mas maayong si VP Sara mismo ang moatbang sa mga pangutana nga wala matubag sa iyang mga kawani.