Nagpagawas og Immigration Lookout Bulletin Order o ILBO ang Department of Justice batok kang Senador Ronald ‘Bato’ dela Rosa aron bantayan ang posibleng paggawas niini sa nasud taliwala sa giatubang nga isyu kalabot sa giingong warrant gikan sa International Criminal Court o ICC.
Matud ni Justice Secretary Fredderick A. Vida, isipon sa DOJ nga “mockery of justice” kon mosulay pagbiya sa Pilipinas ang senador, ug gimandoan na usab niini ang mga law enforcement agencies nga dakpon si Dela Rosa kon adunay pagsulay nga mobiya sa nasud.
Apan, gipatin-aw ni Vida nga wala pay aktibong manhunt operation batok sa senador samtang naghulat pa ang DOJ sa desisyon sa Korte Suprema kalabot sa mga petisyon nga nagkuwestiyon sa legalidad sa posibleng pag-aresto pinaagi sa ICC warrant.
Gibarugan usab sa DOJ ang ilang pagrespeto sa proseso sa Korte Suprema ug sa Senado isip co-equal branch sa gobyerno.
Samtang, naglunsad usab ang DOJ og special panel of prosecutors aron imbestigahan ang nahitabong pagpamusil sulod sa Senado.
Gihatagan og 48 oras ang Philippine National Police, National Bureau of Investigation, CIDG ug Office of the Senate Sergeant-at-Arms aron isumite ang tanang ebidensya nga ilang nakolekta.
Giawhag usab sa DOJ ang media ug publiko nga motabang pinaagi sa pagsumite og mga video, litrato, ug uban pang ebidensya kalabot sa nahitabo sa Senado tali sa Mayo 11 hangtod Mayo 14, 2026.
Dugang pa niini, bisan pa sa pagkasuspenso ni Acting Senate Sergeant-at-Arms Mao Ranada Aplasca sa Office of the Ombudsman, sigon ni Remulla nga wala pay basehan aron suspendihon si NBI Director Melvin Matibag.