Opisyal nga napili si Senador Alan Peter Cayetano isip bag-ong Senate President human sa gihimong botohan sa plenaryo niadtong Lunes, Mayo 11.
Sa 24 ka senador nga mitambong, nakakuha si Cayetano og 13 ka boto, igo aron pildihon si Senador Vicente “Tito” Sotto III nga nakakuha og 9 ka boto.
Ang maong resulta nagpasabot sa iyang paglingkod isip bag-ong lider sa Senado.
Lakip sa ni-suporta kang Cayetano mao ang pipila ka kaalyado sa Minority bloc, apil ang iyang igsoon nga si Sen. Pia Cayetano ug ang mga Villar nga sila Sen. Camille Villar ug Sen. Mark Villar. Sa laing bahin, ang 9 ka senador nga ni-suporta kang Sotto mao sila Sen. Bam Aquino, Win Gatchalian, Risa Hontiveros, Panfilo Lacson, Lito Lapid, Kiko Pangilinan, Raffy Tulfo, Erwin Tulfo, ug mismo si Tito Sotto. Adunay usab duha ka senador nga mi-abstain: Sen. JV Ejercito ug Sen. Juan Miguel Zubiri.
Si Cayetano karon ang ika-upat nga Senate President ubos sa administrasyon ni Presidente Ferdinand Marcos Jr., sunod nila Zubiri, Chiz Escudero, ug Tito Sotto.
Nahitabo ang pag-ilis sa liderato sa Senado sa tunga-tunga sa mainiton nga diskusyon bahin sa Articles of Impeachment batok kang Vice President Sara Duterte.
Gitudlo usab si Senator Loren Legarda isip bag-ong Senate President Pro Tempore hulip kang Senator Panfilo “Ping” Lacson dungan sa pag-ilis usab kang kanhi Senate President Vicente “Tito” Sotto III.