Mag-debut sa Japanese television ang P-pop group nga SB19 sa dili pa ang ilang performance sa Summer Sonic karong weekend. Mahimong live guest ang SB19 sa morning show nga “DayDay” karong Huwebes, takna alas-10:25 sa buntag, sa Japanese Standard Time, diin ilang ipasundayag ang ilang latest single nga “Lawless.”
Matud ni Justin, excited ang grupo tungod kay mao kini ang ilang unang higayon nga mag-perform sa Japanese television, samtang miingon si Josh nga nagpaabot sila sa pagpakigkita sa ilang Japanese fans.
Anaa na sa Japan ang SB19 human sa ilang mga kalihokan sa Estados Unidos, lakip ang ilang performance sa Lollapalooza.
Karong Agosto 14, mag-perform usa ang grupo sa Massive Stage sa Osaka alang sa ilang Summer Sonic debut, samtang sa Agosto 15 motungas sila sa Pacific Stage sa Tokyo. Human sa festival, maghimo ang SB19 og “I WaS There Thanksgiving Fan Meet” sa Yokohama sa Agosto 18.