Gikuwestiyon sa Sandiganbayan ang pagbisita nila Bise Presidente Sara Duterte ug Senador Robin Padilla kang detained Senador Rodante Marcoleta sa PNP General Hospital.
Sumala sa korte, nag-antos si Marcoleta og pulmonya ug girekomenda sa iyang doktor nga magpabilin kini sa isolation tungod kay makatakod ang iyang sakit.
Tungod niini, gipangutana sa mga mahistrado nganong gitugotan gihapon siya nga makadawat og mga bisita.
Giangkon sa PNP Health Service nga adunay kakulang sa pagpatuman sa health protocols, ilabina sa pagsiguro nga magsul-ob og face mask ang mga mibisita.
Apan, gipatin-aw nila nga ang pagtugot sa mga bisita ubos sa responsibilidad sa Criminal Investigation and Detection Group (CIDG).
Bisan pa niini, sumala sa mga doktor nga nagpaayo na ang kahimtang ni Marcoleta ug mahimo na siyang mobiyahe basta magsul-ob og face mask.
Girekomenda usab nga magpabilin siya sa ospital hangtod Hulyo 15 aron makompleto ang iyang antibiotic treatment.
Samtang, gimandoan sa Sandiganbayan ang pagpahigayon og lahi nga medical examination pinaagi sa doktor sa UP-Philippine General Hospital (UP-PGH) aron masiguro ang kahimtang ni Marcoleta sa dili pa siya ipaatubang sa korte alang sa iyang arraignment ug ibalhin sa New Quezon City Jail.
Si Marcoleta nag-atubang og kasong plunder nga may kalabotan sa giingong wala niya ideklarang campaign donations nga nagkantidad og P75 milyon.