Gisugyot ni Akbayan Party-list Representative Chel Diokno nga ipatawag pinaagi sa subpoena ang tax records, bank records, ug mga rekord gikan sa Bureau of Internal Revenue (BIR) ug Anti-Money Laundering Council (AMLC) ni Vice President Sara Duterte ug sa iyang bana.
Apan, misupak ang kampo ni VP Sara pinaagi sa ilang spokesperson nga si Atty. Michael Wesley Poa.
Matud ni Atty. Poa, ang subpoena dili na mahimong instrumento sa hustisya kon gamiton lamang alang sa gitawag nga “fishing expedition.”
Gipahayag usab ni Poa nga lapad kaayo ang hangyo sa prosekusyon ug dili kini uyon sa desisyon sa Korte Suprema sa kaso ni Duterte batok sa House of Representatives.
Dugang pa ni Atty. Michael Poa, walay igo nga ebidensya nga nagsuporta sa matag alegasyon batok sa bise presidente.
Matud niya, bisan pa og daghan ang mga attachment sa mga reklamo nga gisang-at nila Zaballa ug Cabrera sa House of Representatives, wala kini’y bisan usa ka dokumento nga nagpamatuod sa alegasyon sa “unexplained wealth.”