Pakyas ang House Prosecution Panel sa pagpresentar og dugang nga mga testigo sa ikaunom nga adlaw sa impeachment trial ni Bise Presidente Sara Duterte karong adlawa, Miyerkules, Hulyo 15.
Kini human gihangyo sa prosekusyon ang Senate Impeachment Court nga dili na ipadayon ang testimonya ni Office of the Vice President Chief of Staff Zuleika Lopez ug House Security Official Capt. Belinda Bello may kalabotan sa Article IV sa Articles of Impeachment nga naghisgot sa kasong grave threats.
Gipahibalo usab ni Lead Prosecutor Gerville Luistro nga dili na ipresentar sa House Prosecution Panel ang pipila sa ilang nakaiskedyul nga mga saksi sa impeachment trial.
Lakip sa dili na ipatestigo ang representante sa Philippine National Police Firearms and Explosives Office (PNP-FEO), mga mamamahayag nga sila Mikhail Flores ug Bonz Magsambol, si Sheriff Abe Andres, usa ka paryente sa giingong biktima sa hulga, ug usa ka psychiatrist.
Matud ni Luistro, si National Bureau of Investigation (NBI) Director Melvin Matibag na lamang ang katapusang saksi sa prosekusyon alang sa Article IV.
Kumpiyansa si House Prosecutor Representative Lorenz Defensor sa mga testigong ilang naipresentar kabahin sa Article IV nga naghisgot sa giingong grave threats sa nagpadayon nga impeachment trial.
Dugang pa ni Defensor nga bisan pa og balik-balikon sa depensa ang pagpangutana atol sa cross-examination, wala silay mapugos nga mausab sa testimonya sa ilang mga testigo tungod kay nagsulti kini sa kamatuoran ug wala’y gitagong impormasyon.