Nagsugod na karong Lunes didto sa Tehran ang dako nga prosesyon alang sa lubong sa mitaliwan nga Supreme Leader sa Iran nga si Ali Khamenei kauban ang tulo ka miyembro sa iyang pamilya, sumala sa report sa ilang state media.
Gidagsaan sa minilyon ka mga nagsubo nga katawhan ang mga kadalanan sa kapital nga dako kaayong pundok aron ihatod ug hatagan og kataposang pasidungog ang lider nga nagdumala sa maong nasod sulod sa kapin tulo ka dekada. Kahinumduman nga napatay si Khamenei niadtong Pebrero 28 sa unang adlaw sa pag-ulbo sa gubat tali sa US, Israel, ug Iran.
Gawas sa paglubong, giisip usab sa mga otoridad sa Iran ang maong seremonyas isip usa ka kahigayonan aron ipakita sa tibuok kalibutan ang ilang kalig-on ug kaisog human sa pipila ka semana nga pakiggubat. Hugot usab nga nagmabinantayon ang militar ug mga pulis aron maseguro nga hapsay ang dagan sa prosesyon ug malikayan ang bisan unsang disgrasya o stampede tungod sa kadako sa panon sa mga tawo.