Gipahibalo sa militanteng grupong Hamas ang pormal nga pagbungkag sa ilang gobyerno nga nagdumala sa Gaza Strip sulod sa halos duha ka dekada, isip bahin sa pagpangandam sa pagbalhin sa gahom ngadto sa usa ka bag-ong komite.
Kini nga lakang kabahin sa gikasabutang ceasefire ug sa plano sa Estados Unidos alang sa transisyon sa maong rehiyon human sa gubat. Ang maong administrasyon pulihan sa National Committee for the Administration of Gaza (NCAG), nga gilangkuban sa mga Palestinian technocrats o mga eksperto nga gipaluyohan sa United Nations (UN) aron maoy modumala sa sibil nga kalihokan ug sa dinalian nga pagpahiuli sa mga nag-unang serbisyo alang sa mga residente.
Bisan pa man niini, nagpabilin nga dako nga pangutana alang sa tibuok kalibutan kung mosunod ba ang Hamas sa labing krusyal nga kondisyon nga mao ang pagdis-arma o pagtahan sa ilang mga armas. Gipasabot sa Hamas nga pamaagi kini aron mapadali ang pagtukod pag-usab sa maong dapit, samtang gipakaminos naman kini sa nasod sa Israel ug giisip nga usa lamang ka politikal nga taktika nga walay dakong kausaban sa tinuod nga sitwasyon sa yuta.