Nagkatubag ang duha ka kampo tali ni House private prosecutor nga si Atty. Mae Divinagracia ug defense counsel nga si Atty. Kristine Ferrer atol sa pagpadayon sa impeachment trial batok kang Vice President Sara Duterte kagahapong adlawa.
Gikuwestiyon ni Divinagracia si OVP Assistant Chief of Staff Lemuel Ortonio bahin sa iyang giingong kakulang sa kahibalo sa liquidation reports, disbursement ug recording sa confidential funds.
Tungod niini, gipangutana ni Divinagracia kung si Vice President Sara Duterte na lamang ba ang adunay kahibalo bahin sa mga transaksyon sa confidential funds, human miangkon ang ubang opisyal nga wala silay igong kahibalo sa maong mga proseso.
Apan misupak si Atty. Ferrer ug mi-object nga “speculative” ang pangutana.
Gipunto usab ni Divinagracia nga mahimong malangan ang impeachment trial kung matagbalik ang pangutana sa testigo, unya mag-usab-usab usab ang ground sa objection sa defense.
Sa ulahi, giusab ni Ferrer ang iyang objection ug giingong “incompetent” ang bag-ong ground sa iyang pagsupak.