Nangayo og upat ka adlaw nga ekstensyon ug dugang nga pondo sa puwersa o teams ang House prosecution panel ngadto sa impeachment court aron mapaspasan ang pagmarka sa liboang dokumentaryong ebidensya batok kang Vice President Sara Duterte.
Matud ni Lead Prosecutor Rep. Jervil Luistro, kapin sa 3,900 ka mga dokumento gikan sa Department of Education (DepEd) ug Office of the Vice President (OVP) nga may kalabutan sa confidential funds ang kinahanglan pang rebyuhon ug markahan. Gidugang ni Manila Representative Joel Chua nga naglaom silang aprobahan sa Senado ang maong hangyo aron dili maantala ang pagsugod sa opisyal nga paglilitis karong umaabot nga Hulyo 6.
Ubay sa nagpadayon nga pre-trial, gisugyot usab sa prosekusyon nga unahon sa pag-usisa sa husay ang mga alegasyon sa assassination plot, grave threats, ug inciting to sedition batok sa Bise Presidente. Gitan-aw usab sa maong kampo ang posibilidad nga maablihan ang usa ka selyadong kahon gikan sa BIR nga duna matud pa’y sulod nga mga dokumento kalabot sa giingong unexplained wealth ni Duterte.