Gipanghimakak sa kampo ni Vice President Sara Duterte ang mga pasangil nga sila ang hinungdan sa pagkalangan sa pre-trial proceedings sa iyang impeachment case, dungan sa pag-ingon nga padayon ang ilang paningkamot nga mapaspasan ang pagmarka sa liboang dokumentaryong ebidensya.
Matud ni Defense Counsel Atty. Michael Poa, duna’y maayong progreso ang gihimong pre-marking sessions ug gani nagkasabot ang duha ka tampok nga magpundok og dugang marking station alang sa Article 2—nga naglambigit sa giingong wala ma-deklara nga mga kabtangan sa Bise Presidente—aron mas mapadali ang dagan niini. Gidefensahan usab ni Poa ang bulag nga pagmarka sa mga dokumento tungod kay duna’y mga higayon nga dili magkaparehas ang kopya sa duha ka kampo, sama sa usa ka dokumento nga nakit-ang kulang og usa ka panid sa bahin sa prosecution.
Sa pikas bahin, gipalagan ni Atty. Mark Villuan ang mga report nga undermanned o kuwang sa tawo ang ilang grupo sa depensa. Matud niya, kompleto sila sa personnel ug nagsubay sa tanang kamandoan sa impeachment court, diin iyang gitoandok nga ang kampo pa gani sa prosecution ang nakatala og kakuwang sa mga tawo atol sa pagmarka sa ebidensya. Gipasiugda sa depensa nga normal lang ang maong proseso isip preparasyon sa husay ug wala silay tinguha nga langanon ang maong kaso.