Hingpit nga gibungkag ug gisunog sa Philippine Drug Enforcement Agency (PDEA) ang mikabat sa ₱1,913,229,701.78 nga kantidad sa mga nasakmit nga iligal nga droga karong adlawa, Hulyo 8, 2026, sa Cosmopolitan Memorial Chapels and Crematory sa Gregorio Araneta Avenue, Barangay Doña Imelda sa maong dakbayan.
Ang maong mga kontrabando gipaubos sa thermal decomposition o pagsunog ubos sa hugot nga seguridad aron masiguro nga permanenteng mapugngan ang sirkulasyon niii ug dili na makabalik pa sa mga komunidad.
Ang kinatibuk-ang gibug-aton sa gigubang droga mikabat ngadto sa 335,668.1821 gramos nga solidong matang ug 1,025.7000 ka mililitro sa liquid Marijuana.
Sumala sa opisyal nga rekord sa PDEA, gilangkuban kini sa mosunod:
Shabu (Methamphetamine Hydrochloride): 279,671.7975 gramos
Marijuana: 55,618.9291 gramos
MDMA (Ecstasy): 202.6755 gramos (sulod sa 316 ka kapsula)
Diazepam: 77.5000 gramos
Pseudoephedrine: 97.2800 gramos
Liquid Marijuana: 933.0000 mililitro
Toluene: 92.7000 mililitro
Gisaksihan ang maong public destruction ni Dangerous Drugs Board (DDB) Chairman Secretary Oscar F. Valenzuela isip pinasidunggang dapit, kauban ang mga representante gikan sa Department of Justice (DOJ), Department of the Interior and Local Government (DILG), mga ahensya sa balaod, mga non-government organization (NGOs), mga opisyal sa barangay, ug mga sakop sa media aron masiguro ang transparency ug legalidad sa maong proseso.
Matud pa ni PDEA Director General Undersecretary Isagani R. Nerez, ang pagsunog sa maong mga ebidensya gihimo human migawas ang dinalian nga kamandoan gikan sa Regional Trial Courts human usab malampusong nakiha ug napahuway ang mga kaso sa korte.
Tumong usab niini nga mapugngan ang gitawag nga drug recycling o ang pagbaligya pag-usab sa mga nasakmit nga druga ug aron mapalig-on ang pagsalig sa publiko ubos sa panan-awon sa “Bagong Pilipinas”.