Miani og managlahing reaksyon ug komento gikan sa mga legal experts sa Rehiyon 10 human ssng init nga debate kalabot sa gipresentang ebidensya sa prosekusyon sa nagpadayong impeachment trial batok kang Vice President Sara Duterte.
Sa eksklusibong pakighinabi sa Bombo Radyo, nagkanayon si Atty. Eddie Cuaresma, ang kanhi presidente sa Integrated Bar of the Philippines (IBP), nga dako og gibug-aton ug “credible” ang gipresentang testimonya sa usa ka saksi gikan sa National Bureau of Investigation (NBI).
Samtang, giisip nga huyang ug dili epektibo ang gipresentang ebidensya sa House prosecution ubos sa Article 4 o grave threats batok kang Vice President Sara Duterte sa nagpadayong impeachment trial sa Senado.
Matud ni Atty. Orlando “Orly” Montalban usa ka legal analyst, nga ang pamahayag sa Bise Presidente bahin sa giingong pag-hire og assassin usa lamang ka “conditional threat” o “revenge from the grave.”
Matud ni Montalban, mo-operate lamang kini kon ugaling mamatay o patyon una ang Bise Presidente, ug giluwat lamang kini taliwala sa grabeng stress sa dihang gidetain sa Kongreso ang iyang Chief of Staff.
Dugang pa ni Montalban, pabilin kining lunsay nga estorya tungod kay wala may napamatud-an ang prosekusyon nga adunay tinuod nga mopatay nga gisuholan ubos sa Revised Penal Code.
Giklaro usab sa abogado nga ang giingong pamahayag ni VP Sara nga putlan og liog ang Presidente, produkto lamang sa imahinasyon sa Bise Presidente, ug ang pag-imahinasyon dili gayod matawag nga usa ka kriminal o impeachable act.