Gitudlo sa Philippine Drug Enforcement Agency (PDEA) si kanhi Bangsamoro Parliament member Sultan Edrieza Rimbang isip giingong usa sa mga mastermind sa pagsulod sa ilegal nga droga nga nagkantidad og ₱3.54 bilyon gikan sa Laos.
Sa pagdungog sa House Committee on Dangerous Drugs, miingon si PDEA Undersecretary Isagani Nerez nga base sa mga affidavit sa mga person of interest, dili lamang financier si Rimbang kondili usa usab sa mga nag-unang tawo nga nalambigit sa pagplano sa maong shipment nga nasakmit niadtong Oktubre 1.
Matod ni Nerez, wala pa makakuha og affidavit gikan kang Rimbang ang mga awtoridad ug nagpadayon pa sila sa pagkolekta sa mga pahayag ug dokumento nga mahimong gamiton isip ebidensiya sa imbestigasyon.
Gawas sa maong kaso, giklaro usab ni Nerez nga wala pay kumpirmadong ebidensiya nga ang laing drug shipment nga nasakmit sa Thailand niadtong Oktubre 7 padulong unta sa Pilipinas.