Gipailawom na sa DNA crossmatching ang wala mailhing patay’ng lawas nga gisulod sa sako ug nakaplagang naglutaw sa Pulangi River sa Barangay Nabundas, Malidegao, SGA-BARMM aron masuta kung kini ba ang missing hiker sa Mt. Kalatungan, Bukidnon nga si Alkharj Zamayla.
Miingon si Malidegao Police Chief Captain Vilma Dimaraw sa maong dapit nga dako ang posibilidad nga ang maong mga lawas iya ni Zamayla, 31 anyos, nga kapin usa ka bulan nang nawala.
Nakigkoordinar dayon sa kapulisan ang pamilya human nila makita sa social media ang deskripsyon sa biktima nga motakdo sa katapusang gisul-ob ni Zamayla.
Nakuha na ang DNA sample gikan sa niinin ug ikumpara kini sa sample sa igsuon sa missing hiker, apan posible pang moabot og pipila ka bulan sa dili pa mogawas ang resulta.
Nagtuo usab ang Malidegao Police nga biktima sa foul play ang nakaplagang patay’ng lawas tungod kini nakagapos ug gisulod sa sako sa dihang narekober sa suba.