94 ka school drills, gipatuman sa PRO10 alang sa seguridad sa mga eskuwelahan

Nagpatuman ang Police Regional Office 10 o PRO10 og 94 ka School Simulation Exercise (SIMEX) sa Northern Mindanao aron mapalig-on ang kahandam sa mga eskuwelahan batok sa posibleng active shooter incidents.

Gitudloan pinaagi sa maong drills ang mga estudyante, magtutudlo, ug school personnel sa “Run, Hide, Fight” protocol isip hustong pagtubag panahon sa emerhensiya.

Pinakadaghan nga nakapahigayon og drills ang Misamis Occidental PPO nga adunay 26, gisundan sa Misamis Oriental PPO nga 24, ug Cagayan de Oro City Police Office nga 20.

Matud ni PRO10 Regional Director PBGen. Christopher N. Abrahano, tumong sa programa nga mapalambo ang kahibalo ug kahandam sa mga eskuwelahan aron masiguro ang kaluwasan sa mga estudyante ug personnel.