Gipailom sa DNA test ang napalgang patay’ng lawas sa BARMM aron hingpit nga masuta kung kini ba ang missing hiker nga si Alkarj Zamayla, kinsa nawala niadtong Hunyo 12, 2026.
Sa pakighinabi sa Bombo Radyo kang PCPT Ernie P. Cabrera, OIC sa Pangantucan MPS, nakig-coordinate na sila sa forensic unit ug Investigator-on-Case human nakadawat og report nga adunay napalgan nga patay’ng lawas sa may Pulangi River nga nasakop sa bahin sa Cotabato, BARMM.
Nasayran nga nakasulod sa sako ug anaa na sa advanced state of decomposition ang maong lawas sa dihang napalgan, hinungdan nga lisod na kini mailhan pinaagi lang sa pisikal nga panagway.
Tungod niini, personal nga naghangyo ang pamilya sa missing hiker nga ipaubos sa DNA test ang patay’ng lawas aron makumpirma ang tinuod nga identidad niini samtang padayon pang gihulat ang opisyal nga resulta.
Sa pikas bahin, gipailom na usab sa investigation phase ang kaso aron sutaon ang uban pang posibleng anggulo sa maong pagkawala human gi-undang ang actual search and rescue operation sa bukid.