Sa nagpadayon nga impeachment trial batok kang Vice President Sara Duterte, gibutyag sa Kabataan Partylist Southern Mindanao nga ang maong proseso usa ka importante nga lakang aron mapanubag ang mga opisyal sa gobyerno ug mapalig-on ang accountability sa serbisyo publiko.
Sa pakighinabi sa Bombo Radyo kang Kabataan Partylist Southern Mindanao Chairperson Cobbie Jan Canda nga ang presentasyon sa House prosecution sa mga ebidensya sa unang semana sa pagdungog nakahatag og lig-on nga pundasyon sa mga alegasyon batok sa Bise Presidente.
Matod ni Canda, ang depensa mas nagtutok sa mga teknikal nga isyu ug sa pagkuwestiyon sa mga testigo kaysa sa direktang pagtubag sa mga alegasyon.
Gisalikway usab ni Canda ang pamahayag nga politically motivated ang impeachment ug giingong ang maong proseso gitugotan sa Konstitusyon isip pamaagi sa pagpanubag sa mga taas nga opisyal sa gobyerno.
Giawhag usab niini ang publiko, ilabina ang kabatan-onan, nga magpadayon sa pag-apil sa mga demokratikong pamaagi aron mapalig-on ang transparency ug accountability sa gobyerno.