Gikaingong panimalos ang nag-unang motibo sa pagpamusil sa Purok 8, Barangay Mabuhay, San Jose, Malaybalay City, niadtong Martes sa gabii, nga miresulta sa pagkaangol sa upat ka indibidwal lakip ang usa ka menor de edad. Sa pakighinabi sa Bombo Radyo, gipahayag ni Alyas “Rolita,” inahan sa usa sa mga biktima, nga duna nay naunang hulga ug tensyon tali sa ilang silingan tungod sa miaging panagbangi. Matod niya, bisan og nagplano na sila nga idangat ang reklamo sa barangay aron makab-ot ang kahusay, naunhan sila sa maduguong pagpamusil diin naapil ang mga inosenteng residente.
Sumala sa testimonya ni Alyas “Danilo,” usa sa mga saksi, kalit lang silang nakadungog og sunod-sunod nga buto sa armas samtang nagtambay sa usa ka barbecuehan. Sa ilang pagdagan aron maluwas, nasuta nga upat ang naigo, lakip ang usa ka 9-anyos nga Grade 4 pupil nga nagdula lamang sa dapit.
Gikumpirma ni PCPT Sheila Joy P. Jangad sa Bukidnon Police Provincial Office (BPPO) nga ang mga biktima gidala dayon sa Bukidnon Provincial Medical Center (BPMC). Usa sa mga anggulo nga gisubay sa kapulisan mao ang miaging kagubot tali sa usa sa mga biktima ug sa ilang silingan nga posibleng mitultol sa krimen.
Sa pagkakaron, padayon ang imbestigasyon sa kapulisan alang sa pagsikop sa giilang Person of Interest (POI), samtang ang pamilya sa mga biktima naghangyo og dugang proteksyon tungod sa kahadlok sa posibleng sunod nga pagpangatake.