Nagpadayon ang lawom nga imbestigasyon sa kapulisan human mapalgan ang duha ka patayng lawas sa Purok 6, Barangay Palacapao, Quezon, Bukidnon alas 4:30 sa hapon niadtong Hulyo 3.
Gibutyag ni PLtCol. Erwin R. Naelga, Hepe sa Quezon Municipal Police Station, ang mga biktima nga sila si Dionisio Yagunya, 64-anyos, ug ang iyang live-in partner nga si Augustina, 66-anyos.
Matud pa ni PLtCol. Naelga, dako ang ilang pagduda nga adunay foul play sa maong hitabo human makarekober ang Bukidnon Forensic Unit ug upat ka basiyo sa bala ug usa ka fired bullet gikan sa giingong calibre .45 nga armas diha sa crime scene.
Dugang pa niini, ang pag-umangkon sa mga biktima ang unang nakadiskubre sa patay’ng lawas sa sala nga bahin sa balay, human niya kini gibisita tungod kay pipila na ka adlaw nga wala kini makita.
Basi sa eksaminasyon sa forensic team, gibanabanang anaa na sa kapin usa ka semana o pito ka adlaw nga patay ang mga biktima tungod sa kahimtang sa ilang mga patay’ng lawas.
Sa pagkakaron, nagpadayon pa ang gihimong imbestigasyon sa kapulisan ngadto sa barangay aron sutaon ang profile sa mga biktima ug aron matumbok ang motibo ug sa maong krimen.
Gibutyag ni PLtCol. Naelga nga tanang anggulo ilaha karong gikonsidera sa maong kaso.