Gikoronahan si Gwendoline Meliz Soriano sa Baguio City isip Binibining Pilipinas International 2026, samtang si Sasha-Juli Belle Lacuna sa Tarlac ang gideklarang Binibining Pilipinas Globe 2026 atol sa 62nd Binibining Pilipinas Grand Coronation Night nga gipahigayon sa Smart Araneta Coliseum niadtong Sabado sa gabii, Hulyo 18.
Giselyohan ni Soriano ang kadaugan human niyang masakmit ang daghang special awards ug nagpasundayag og maayong tubag sa Top 4 question-and-answer portion.
Nahimong 1st Runner-Up si Julianne Raine Antonio sa Dumaguete, samtang 2nd Runner-Up si Tracy Mae Sunio sa Bacolod.
Sa final Q&A, gipasidunggan sa mga hurado ang tubag ni Soriano mahitungod sa pagsalig sa plano sa Ginoo ug pagdawat sa kapakyasan isip kabahin sa paglambo ug kalampusan. Si Lacuna usab nakadani sa atensyon sa iyang tubag nga ang empathy usa ka hiyas sa tawo nga dili mapulihan sa Artificial Intelligence o AI.
Samtang, ang bugtong representante sa Cebu nga si Christine Jorelle F. Usaraga, Candidate No. 35, wala makasulod sa Top 12, apan nakahatag gihapon og maayong pasundayag sa swimsuit competition.