Kinahanglang mangita una og laing kuhaan og pundo ang gobyerno sa dili pa hingpit nga tangtangon ang travel tax.
Kini ang gibutyag ni Ray Talimio Jr., Kanhi miembro sa Oro Chamber sa Economic Development Committee sa RDC-X, nga bisan og makatabang kini sa mga biyahero, gipasabot ni Talimio nga mawad-an og budget ang tulo ka importanteng ahensya nga nagsalig sa maong koleksyon.
Kasamtangan, ang travel tax gibahin ngadto sa TIEZA (50%) alang sa mga proyekto sa turismo, CHED (40%) alang sa mga scholarship sa mga estudyante ug NCCA (10%) alang sa pagpreserba sa kultura.
Matud ni Talimio, kung kalit nga wagtangon ang maong pundo, maapektuhan ang serbisyo niini nga mga ahensya tungod kay wala kini gilakip sa regular nga budget sa nasud.
Isip sugyot, imbes nga tangtangon dayon ang travel tax, mas maayo matud pa nga hinay-hinayon lang ang pagwagtang niini aron dili kalit ang pagkawala sa pundo alang sa turismo ug edukasyon.