Gipadayag ni Bise-Presidente Sara Duterte ang kahinungdanon sa pagpanalipod sa mabulukong kabilin sa pito ka tribo sa Bukidnon atol sa selebrasyon sa Kaamulan Festival 2026.
Sa iyang video message nga gipasalida sa Kaamulan Grounds, gipahayag ni Duterte nga ang maong festival usa ka mahinungdanong dalan sa pagpakita sa buhing kasaysayan ug tradisyon sa mga Lumad. Matud sa Bise-Presidente, ang mga aktibidad sama sa street dancing ug float competition nagsilbing pahinumdom nga ang kalig-on sa nasod nagagikan sa kusog sa mga komunidad sa Lumad.
Gidayeg usab ni Duterte ang kagamhanang lokal sa Bukidnon sa malampusong pagbalanse sa pagpalambo sa ekonomiya ug turismo dungan sa pagpreserba sa kultura. Nanawagan ang ikaduhang pangulo alang sa padayon nga panaghiusa ug nasyonal nga pagtinabangay pinaagi sa mabulukong selebrasyon sa Kaamulan.