Tulo ang samdan human miresulta sa pagpamusil ang panaglalis nga nagsugod sa pagpanunggab sa Purok 6B, Manubiray, Lampanusan, Kalilangan, Bukidnon, niadtong milabay’ng adlaw.
Sumala sa unang pagsusi sa Kalilangan Municipal Police Station, naglakaw pauli ang mga biktima nga giila sa alyas nga Fredo, 63 anyos, ug Along, 69 anyos, sa dihang giatangan kini sa mga lalaki nga giila sa alyas nga Boboy, 47 anyos, ug Cardo, 45 anyos. Giingong nakainom og makahubog nga ilimnon si Boboy niadtong higayona.
Sa wala matino nga hinungdan, miduol si Boboy kang Fredo ug miingon og “Hambog ka,” sa wala pa kini dunggaba sa nagkalainlaing bahin sa lawas.
Aron panalipdan ang kaugalingon, mibunot og pusil si Fredo ug gipusil si Boboy. Samtang misulay sa pagbulag sa duha, naigo usab sa bala sa tuong kamot si Cardo.
Gidala na sa tambalanan ang tulo ka samdan, samtang nagpadayon ang kapulisan sa ilang pagsusi aron matino ang tibuok kahimtang sa maong hitabo.