Gihagit sa hepe sa Bukidnon Provincial Medical Center (BPMC) nga si Dr. Miguel Antonio Prantilla, ang duha ka kampo nga malambigit sa kontrobersiya nga mag-atubang ug mag-istorya aron maresolba ang tinuod nga nahhitabo sa maong pasilidad.
Pinaagi sa usa ka pamahayag, gipahayag ni Dr. Prantilla nga buot niining mahibaloan ang kamatuoran pinaagi sa pagpaminaw sa duha ka bahin. Matud pa niini, gitawagan na niya ang kapitan sa barangay aron mag-organisa ug usa ka tigom kauban ang nahisgutang empleyado aron maresolba ang maong isyu.
Dugang pa sa hepe sa ospital, nakita niini nga adunay mga “exaggerations” ug nagka-lahi nga pagsubay sa matag bahin. Tungod niini, naglaum siya nga pinaagi sa maong pag-atubangay sa duha ka kampo, masayran ug maghatag ug katin-awan kung unsa gyud ang matuod nga nahitabo.
Kahinumduman nga gipanalipdan ug nagpasalamat ang asawa sa usa ka pasyente sa maong ospital sa maayong pag-atiman matud pa sa mga doktor, nga nakatabang sa pagpaayo sa iyang bana human kini naglisod sa paglakaw ug nagkinahanglan og dugang nga pagpanambal.
Hugot usab nga gipasabot niini nga wala kini nagpasabot nga nilaban sa maong ospital apan gisaysay lamang niini ang ilang kasinatian.
Kini nga panghitabo, nag-ugat human sa isyu nga adunay mireklamo sa maong tambalan tungod sa pagbalibad niini sa usa ka pasyente nga gidala sa maong ospital.
Kahinumduman nga nanawagan si Barangay Casisang, Malaybalay City, Bukidnon Kapitan Gregorio D. Jaroy sa gobernador nga badlongon ang mga kawani sa Provincial Hospital nga giingong dili maayong pagtratar sa pasyente nga ilang gidala sa maong pasilidad.
Subay niini, gipunting ni Prantilla, nga lisud ang adunay nagkadaiyang istoryang mukatap nga usa lamang ka bahin ang nadungog.
Busa gipasabot niini nga dili angay nga tibuok ospital o tanang health worker ang basulon kon adunay reklamo batok sa usa ka empleyado.
Gidugang pa niini nga mas maayong sulbaron ang mga isyu pinaagi sa hustong pamaagi imbes nga idiretso kini sa social media.