MALAYBALAY CITY, BUKIDNON — Gipasaligan sa Commission on Elections (COMELEC) Malaybalay City nga padayon ug 100 porsyentong giandaman ang Barangay ug Sangguniang Kabataan Elections (BSKE) 2026 samtang wala pa’y pormal nga balaod nga nag-oktaba sa maong botohan.
Sa pakighinabi sa Bombo Radyo Malaybalay, gipatin-aw ni COMELEC Malaybalay Election Officer Atty. Danilo Dividina nga nagpabilin nga epektibo ang Republic Act 12232 nga nagtakda sa BSKE sa Nobyembre 2, 2026.
Gipunting ni Dividina nga gikinahanglang maklaro ang pinal nga desisyon sa Kongreso ug mapirmahan sa Presidente ang bag-ong balaod sa dili pa ang Septiyembre 28. Mao kini ang nakatakdang pagsugod sa Filing of Certificate of Candidacy (COC) nga molungtad hangtod Oktubre 5.
Gipasabot usab sa opisyal nga kon idesisyonan man gihapon ang pag-oktaba, mahimong maapektuhan na usab ang katungod sa mga botante sa pagpili og bag-ong mga lider sa barangay ug SK human sa mga nakalabayng pagtrasar sa eleksyon.