Posibleng makapaluya sa gihangyo nga Temporary Restraining Order o TRO ni Senador Ronald “Bato” Dela Rosa sa Korte Suprema ang iyang paggawas gikan sa protective custody sa Senado.
Matud ni election lawyer Atty. Romulo Macalintal, nakamugna og gitawag nga “supervening event” ang pagbiya ni Dela Rosa sa Senado nga mahimong hinungdan aron mahimong “moot and academic” o wala nay saysay ang iyang petisyon.
Sa pamahayag ni Macalintal, sigon niini nga ang gihangyo nga TRO nakabase sa posibleng pag-aresto kang Dela Rosa samtang anaa pa kini sa protective custody sa Senado.
Apan karon nga wala na siya didto, mahimo nang ikatug-an nga wala nay “imminent danger” o dinaliang hulga nga maaresto, nga maoy usa sa mga batakang rason alang sa paghatag og TRO.
Gidugang pa niini nga kon ipadayon gihapon ni Dela Rosa ang iyang petisyon samtang anaa na sa gawas sa Senado, kinahanglan niyang usbon ug repasohon ang iyang gihain nga mosyon. Kinahanglan usab nga ipahibalo sa iyang kampo sa korte ang pinakabag-ong kahimtang sa kaso.
Nagpasidaan usab si Macalintal nga kon mapakyas ang kampo ni Dela Rosa sa pagdisclose sa bag-ong impormasyon, mahimong mangayo ang gobyerno pinaagi sa Office of the Solicitor General o OSG nga obligahon ang senador nga ibutyag ang iyang nahimutangan o magpakita mismo sa korte aron suportahan ang iyang petisyon.
Kahinumduman nga niadtong Lunes, gipailalom si Dela Rosa sa protective custody sa Senado human sa giingong pagsulay sa mga operatiba sa NBI sa pag-aresto kaniya base sa warrant gikan sa International Criminal Court o ICC may kalabotan sa kasong crimes against humanity tungod sa war on drugs.
Niadtong Miyerkules, wala magpagawas og TRO ang Korte Suprema ug imbis niini, gimandoan ang mga opisyal nga motubag sa petisyon sulod sa tulo ka adlaw.
Pagkasunod adlaw, human sa nahitabong insidente sa pagpamusil sulod sa Senado, gikumpirma nga nakabiya na si Dela Rosa sa Senate premises ug wala na usab sa protective custody.
Sa una nang pamahayag ni NBI Director Melvin Matibag, wala nila gi-aresto si Dela Rosa isip pagrespeto sa protective custody nga gipahigayon sa Senado samtang nagproseso pa kini sa legal remedies kalabot sa ICC warrant.