P6-M nga kantidad sa tinanom nga marijuana, gipangsunog sa Agusan Del Sur

Gibana-banaang mukabat sa 6-milyones pesos ang kantidad sa mga tanom nga marijuana ang gipang-ibot ug gisunog sa otoridad sa Barangay Kasapa 1, Loreto, Agusan del Sur sa nakalabay nga adlaw.

Gihimo kini sa gipalig-on nga kampanya batok sa ilegal nga droga sa Police Regional Office (PRO) 13, inabagan sa Philippine Drug Enforcement Agency (PDEA) ug Philippine Army.

Sigon ni PBGEN Marcial Mariano P. Magistrado IV, PRO13 Director, nga ang operasyon gipahigayon sa nagkahiusang mga personahe gikan sa Loreto Municipal Police Station (MPS), Agusan del Sur Provincial Intelligence Unit, PDEA–Agusan del Sur Provincial Office, 2nd Agusan del Sur Provincial Mobile Force Company, ug Alpha Company sa 60th Infantry Battalion sa Philippine Army, sa usa ka hilit ug lisod maabot nga dapit nga anaa sa 207 ka kilometro ang kalay-on gikan sa Loreto MPS. 

Ang maong operasyon miresulta sa pag-ibot sa gibana-bana nga 23,431 ka hamtong ug dako na nga mga tanom nga marijuana gikan sa plantasyon nga adunay gidak-on nga 16,000 ka metro kwadrado. 

Walay suspetsado nga nadakpan atol sa operasyon apan nailhan na sa mga otoridad ang tawo nga nagtanom ug nag-atiman sa maong mga marijuana.