Napukan ang tinguha sa Gilas Pilipinas nga makasungkit og dakong kadaogan human sila gilat-an sa host team nga Australia Boomers sa iskor nga 92-49, sa pagtapos sa ikatulong window sa FIBA World Cup 2027 Asian Qualifiers didto sa RAC Arena.
Dako nga haw-ang ang gibilin sa pagkawala sa ilang naturalized player nga si Justin Brownlee, hinungdan nga nagkalisod ang pambansang koponan batok sa world No. 6 nga Australia. Human sa sikit nga 8-all nga tabla sa unang kwarter, mipauwan og 16-0 scoring run ang Boomers aron kontrolon ang dula, nga gisundan pa sa 19 ka turnovers sa Gilas nga daling gihimong 30 puntos sa kaatbang.
Tungod sa maong kapildihan, natapos sa Pilipinas ang unang round nga duna’y 2-4 nga record ug mosulod sa sunod nga yugto isip third seed sa Group A. Gilauman nga makabawi ang Gilas sa ikaduhang round diin makatigi niini ang mga nasod sa Jordan ug Iran karong katapusan sa Agosto didto sa Mall of Asia Arena sa Pasay.