Gibutyag sa ika-14 nga adlaw sa impeachment trial nga P375 milyon nga confidential funds sa Office of the Vice President o OVP ang gi-disallow sa Commission on Audit o COA tungod sa giingong iregular nga paggamit niini sa unang tulo ka quarter sa 2023. Matud ni COA-ICFAO auditor Xylene Mae Del Campo, upat ang giila nga accountable sa maong pondo—si Vice President Sara Duterte, SDO Gina Acosta, Chief Accountant Julieta Villadelrey, ug VPSPG Head Col. Raymund Dante Lachica.
Gipasabot ni Del Campo nga si Duterte accountable tungod kay iyang gi-aprobar ang mga transaksyon ug paggamit sa cash advances, samtang si Acosta maoy SDO nga responsable sa pag-disburse sa pondo. Si Lachica nakadawat sa confidential funds bisan dili siya SDO.
Giingon usab ni Del Campo nga direktang nalapas ang COA-DBM Joint Circular 2015-01 sa pagbalhin sa confidential funds ngadto kang Lachica, hinungdan nga gilayon gipagawas ang Notice of Disallowance imbes Notice of Suspension.